Adui yako muombee njaa, akikosea kidogo kandamiza!

WALIOSEMA siasa ni mchezo mchafu, leo nami naungana nao kuyaamini maneno yao. Kweli siasa ni mchezo mchafu!

Wanasiasa daima hubuni stratejia mpya za kujipatia maslahi ya kisiasa, mbinu, mikakati iliyopo katika siasa hasa za ushindani ni jinsi gani chama kimoja kitakavyokigaragaza kingine katika medani za kisiasa, iwe ni kwa majigambo, majibizano, kashfa na hata kubadilisha mwelekeo wa duru za siasa za wakati husika.

Kwa kawaida katika vyama huwa na idara na maofisa maalum wa propaganda, hawa ni makuhani wa propaganda, wamekubuhu, waweza kukushawishi kwamba hivi sasa ni usiku ilhali ni mchana, kisa kuna wingu limetanda.

Propaganda ni utaalamu ambao kwa Tanzania, kinara wake ni Chama Cha Mapinduzi hawa wana ujuzi wa kutosha katika masuala ya propaganda na ujuzi huo si wa kubabaisha, una mashiko ya Urusi na Quba mabingwa wa propaganda za kijamaa duniani.

Chochote kinachotendeka katika medani za siasa hakishangazi, na ndiyo maana sikushangaa kumsikia Mwenyekiti wa Chama Cha Mapinduzi, Taifa, Jakaya Kikwete alipokuwa akifungua tawi la CCM litakalowahudumia wanachama takriban 700 ambao ni wanafunzi wa vyuo vikuu vya Kampala na Makerere, mwishoni mwa wiki iliyopita kuwa, “hali ya kisiasa nchini ni shwari, hizo kelele kelele wanazozisikia ndio siasa, hivyo zisiwape shaka, adui yako muombee njaa, akikosea tu, kandamiza hapo hapo, si mnasikia tunavyokandamiza...” Sehemu ya hafla hiyo kwa bahati ilionyeshwa na Televisheni ya Taifa.

Kumbe, hivi vilio vinavyotolewa na wananchi na wanasiasa kuhusu Buzwagi, Richmond na vinginevyo ni ‘kelele kelele’ tu za kisiasa? Kelele ambazo si hasha kutomzuia mwenye nyumba kulala.

Je ni vipi tutaidadavua kauli hii ya Mwenyekiti wa Chama Dola nchini? Je anataka kutueleza nini hasa? Kelele zinazopigwa siku za hivi karibuni ni suala la kuchunguzwa mikataba inayoingiwa na Serikali kama ile ya madini na ile ya nishati ya umeme.

Mbunge kijana wa Chama Cha Demokrasia na Maendeleo (Chadema) wa jimbo la Kigoma Kaskazini, Zitto Kabwe aliamsha hamasa mpya pale alipoliomba Bunge liunde kamati huru ya kuchunguza uingiaji wa mkataba wa machimbo ya madini katika mgodi wa Buzwagi. Yaliyotokea kwa Zitto ni historia, lakini nini baadaye Rais alifanya?

Alimteua Zitto kuwa mjumbe wa Kamati ya Madini. Waswahili wana msemo usemao kuwa ‘mchawi mpe mtoto alee,’ msemo huo ukasadifu kwa Zitto kupewa kazi ya muda ya kulea mtoto, ni mjumbe wa Kamati ya Madini, alichotaka Zitto kukitoa kikoa, sasa hakitoleki tena, akijaribu tu ni yeye ndiye atakayepelekwa ‘msukule.’

Mapigo ya CCM si ya kitoto, ni ya kisayansi, hawakurupuki bali hufanya hesabu na mara nyingi jawabu zake huwa sahihi.

Badala ya watu kujadili jinsi mikataba ya madini isiyolinufaisha taifa inavyoingiwa, sasa wanamjadili Zitto, kwanini wee, kwanini. Kwani vipi jamani? Kwani wao wananchi wanataka iwe vipi?

Ingelikuwa Rais hakuiteua kamati ile kwa jinsi alivyoiteua angelaumiwa, ameiteua walioteuliwa wanalaumiwa, kwani jamani Zitto kosa lake nini?

Wako waliozikaanga mbuyu, sasa wanawaachia wenye meno watafune. Huo ndio mchezo wa siasa, hautabiriki, haufahamiki.

Haya Rais huyu huyu, wiki tatu zilizopita alilikoroga togwa, alisema kuwa suala la Mahakama ya Kadhi si sera ya CCM wala msimamo wa Serikali yake, tena Rais kenda kuyazungumzia hayo kwenye jukwaa la Kanisa, wakati wa kumsimika Mkuu mpya wa Kanisa la Kiinjili la Kilutheri Tanzania (KKKT), Alex Malasusa. Jambo hilo liliwakera Waislam, walikereka hasa kutokana na hadhira aliyoitumia Rais kuwasilisha ujumbe huo mzito, unaowahusu Waislam.

Binafsi sidhani kama Rais aliyafanya hayo kibubusa, bila shaka alikuwa na sababu zake maridhawa. Lakini nisichokitambua ni kuwa je ile nayo ni siasa?

Kwa kuwa siasa ni uongo na mchezo mchafu, yawezekana ahadi ya kuanzishwa kwa Mahakama ya Kadhi ni ahadi ya uongo wa kisiasa, tuliisikia ikitolewa katika majukwaa ya kisiasa wakati wa kampeni za mwaka 2005, ahadi hiyo hiyo ambayo leo twaambiwa kuwa si sera ya CCM ndiyo iliyotumika kumnadi mgombea wa Urais wa CCM mwaka 2005, tena ilikuwa ikisisitizwa sana katika maeneo yenye Waislam wengi.

Vipi ahadi ile iliingia katika ilani ya uchaguzi ya mwaka 2005, wananchi hawana shida ya kufahamu ila wanafahamu kwamba ipo na kama ilivyo kwa ahadi nyingine zote zilizotolewa wakati wa Kampeni ama zile zilizoingizwa katika ilani, wananchi wangependa ahadi hiyo itekelezwe.

Kama haiwezekani waelezwe mazingira yaliyosababisha kushindwa kuitekeleza ahadi hiyo, lakini kuwaambia wananchi kuwa hiyo si sera ya CCM wala ya Serikali ni kuwacheza shere Wapigakura.

Kwa mtindo huu wa Rais, nadhani hizo alizoziita kelele za kisiasa zitaendelea kupigwa kila uchao na kwa uchache wangu wa nadhari, nafikiri kelele hizi si nzuri, si za afya katika siasa na iko siku Rais zitamgharimu.
hshamte@mwananchi.co.tz